Rusiya Prezidenti Vladimir Putin Ermənistanın baş naziri Nikol Paşinyanla görüşündə İrəvanın Avropa İttifaqına inteqrasiya səyləri fonunda ölkə qarşısında çətin seçim qoyub.
Bizim.Media xəbər verir ki, Putin bildirib ki, Ermənistan ya Avrasiya İqtisadi İttifaqına (Aİİ) üzvlüyünü qoruyub saxlamalı, ya da Aİ ilə inteqrasiya yolunu seçməlidir və şərtlər dəyişməz olaraq qalır.
Putin Rusiyanın Ermənistanla münasibətlərdə strateji tərəfdaşlıq prinsiplərinə tərəfdar olduğunu, Rusiyanın təxminən 30 faiz payla respublikanın əsas ticarət-iqtisadi tərəfdaşı və investor olduğunu vurğulayıb. Cari ilin birinci yarısında əmtəə dövriyyəsi 2,5 milyard dollar təşkil edib.
Rusiya lideri qeyd edib ki, Ermənistanın Aİ-yə can atması ölkənin Aİİ bazarlarındakı üstünlüklərinin sıfırlanmasına və ticarət zəncirlərinin qırılmasına səbəb ola bilər. Halbuki Aİİ-də olduğu illər ərzində Ermənistanın ÜDM-i təxminən iki dəfə artaraq 10,6 milyard dollardan 29,2 milyard dollara çatıb.
Putin ölkənin gələcək kursu ilə bağlı Ermənistan xalqının açıq şəkildə fikrini bildirməli olduğunu, Rusiyanın istənilən seçkiyə hörmətlə yanaşacağını, lakin İrəvanın bu məsələdə tezliklə qərarlaşmalı və ticarət-iqtisadi siyasətin buna uyğun tənzimlənəcəyini qeyd edib. Öz növbəsində, Nikol Paşinyan Rusiya ilə münasibətləri çox yüksək qiymətləndirdiklərini və bu əlaqələrə çox həssas yanaşdıqlarını bildirib.
Bizim.Media
