İki dəfə aşiq oldu, hər iki qadın öldü – Əməkdar artistin ürəkdağlayan TALEYİ - ÖZƏL

Azərbaycan Mədəniyyət xadimlərindən bir çoxu həyatlarının sonuna kimi subaylığın daşını atmayıblar. Xalq artistlərimizdən Səfurə İbrahimova, Zərnigar Ağakişiyeva kimi məşhur aktrisialarımız da ailə qurmadan, övlad sahibi olmadan gözlərini əbədi olaraq yumublar.

Bu siyahıda Azərbaycan Gənc Tamaşaçılar Teatrının aktyoru, aparıcı səhnə ustası İlham Əsədov da var.

Əsədov İlham Əsəd oğlu 1 may 1970-ci ildə Azərbaycan Respublikası Bakı şəhərində doğulub. 1993-cü ildə Azərbaycan Dövlət Mədəniyyət və İncəsənət Universitetinin «Dram və kino aktyorluğu» fakültəsini bitirib.

1994-cü ildən «İlham» Miniatür teatrının, 2003-cü ildən Azərbaycan Dövlət Gənc Tamaşaçılar Teatrının aktyorudur.

2016-ci ilin noyabr ayının 9-da Kalmıkiya Respublikasının,10 dekabr 2018-ci il tarixində Azərbaycan Respublikasının Əməkdar artisti fəxri adı ilə təltif olunub.

Aktyor şəxsi həyatı ilə bağlı Bizim.Media-ya açıqlama verib. Onun sözlərinə görə, ilk sevgisi uğursuz olub:

“Həyatımın ən gözəl illərində, hardasa 25 yaşımda mən bir xanıma aşiq olmağa başladım. Hiss etdim ki, o xanım da məni sevir. Qarşılıqlı sevgimiz bizi nişana doğru apardı. O zaman mən “ İlham” mineatür teatrında çalışırdım. O zamankı sənət dostlarım hətta nişan mərasimimdə də iştirak etmişdilər. Təəssüf ki, mən nişanlımı avtomobil qəzasında itirdim”.

İlham Əsədov bu uğursuz sevgisindən illər sonra daha bir xanıma aşiq olur

“Bir gün təsadüfən qarşılaşdığım bir xanımı çox bəyəndim. Sonra onunla tanış olub görüşməyə başladım. Münasibətimizin ən pik nöqtəsində isə xanım qəfil yox olmağa başladı. Ara-sıra gedib gəlmələri ilə məni xeyli yordu. Sonra təsadüfən bildim ki, sən demə bu xanım xərçəng xəstəsi imiş. Bir gün o, mənə dedi ki, səni bədbəxt etmək istəmirəm. Nə qədər gec deyil, başqa bir xanımla evlən. Ailə sahibi ol. Mən isə həyatdan köçdüyü son günə kimi onun yanında oldum. O zamanlar qismət və ya alın yazısı deyilən bir şeyə inanmırdım. Yaşadıqlarımdan sonra anladım ki, sən demə yazılanı pozmaq heç bir vəchlə mümkün deyil”.

Hazırda sevdiyi xanımın olmasına gəlincə isə aktyor bildirib ki, daha sevmək fikri yoxdur və həyatını yalnız başa vurmaq niyyətindədir: 

“Bütün sevgimi sənətimə və qardaşımın övladlarına ayırmışam. Bir növ öz taleyimlə də barışmışam. Hazırda çalışdığım GTT-da Həmkarlar Komitəsinin sədriyəm və komitənin 250 üzvü var. Məndən yaşca böyük olmalarına baxmayaraq hərdən üzvlərə deyirəm ki, siz mənim övladlarımsınız. Tamaşa məşqləri, təşkilati işlər, film çəkilişləri məni o qədər məşğul edir ki, əksər hallarda günün necə başlayıb bitdiyini də unuduram. Bir sözlə darıxmağa vaxtım qalmır...

Leyla Şah, Bizim.Media