Kapital Bankda "Müddətli depozit"lərin faiz dərəcəsi dollar valyutasi ilə 0.1 faizdən 3.5 faizə qədər artırılıb. “Müddətli depozit” ilə 500 dollardan başlayan istənilən məbləği 12 aydan 36 ayadək müddətə banka yerləşdirərək çoxaltmaq mümkündür.
Bəs digər banklarda vəziyyət necədir?
Bizim.Media suala cavab tapmaq üçün digər kommersiya banklarının əmanət şərtlərini araşdırıb.
MÖVZU İLƏ BAĞLI:
Batan banklardakı əmanətləri kim GERİ QAYTARACAQ? – AÇIQLAMA
“Access Bank” ASC
Bu bankda “manatla olan müddətli depozitin illik faiz dərəcəsi 10.7 faiz, faiz gəliri isə 2140 manat təşkil edir. Depozit üçün minimum 50, maksimum 100 000 min manat tələb olunur, müddəti isə 6-24 ay arasında dəyişir.
Əgər bir şəxs 24 ay müddəti üçün 40 000 manatlıq depozit yatırmaq istəyirsə, o zaman illik 10.7 faizlə 8560 manat gəlir əldə edəcək. Yaxud 20 000 manatlıq depozitlə kifayətlənmək istəyirsə, o zaman eyni faiz dərəcəsi və eyni müddətlə gəliri 4280 manat olacaq.
Qeyd edək ki, “Access Bank”ın müddətli depozitləri Əmanətlərin Sığortalanması Fondu tərəfindən sığortalanır.
“Yelo Bank” ASC
Bank müştəriləri üçün iki depozit növü təklif edir. Bunlardan biri olan “Yelo sabit” depoziti üzrə müştəri gəlir əldə etməklə yanaşı, istəyinə görə faizləri hər ay və ya müddətin sonunda ala bilər. Faizləri aylıq əldə etmək istəyən müştərilərə plastik kart bank tərəfindən hədiyyə edilir.
Belə ki, bu bankda həm dollarla həm də manatla depozit qoymaq mümkündür. Müddəti 12-24 ay arasında dəyişir. Faizlərin ödənişi aylıq və ya müddətin sonunda həyata keçirilir. Əmanətlərin sayında heç bir məhdudiyyət qoyulmayıb və üstəlik aylıq faizlərin alınması üçün kart hədiyyə verilir.
“Yelo Bank”ın başqa bir təklif paketi “Yelo yığım” adlanır. Bu paketdə 100-300 000 manat arasında əmanət qoymaq mümkündür. Hətta dollarla da depozit yatırmaq mümkündür.
Manatla olan depozitin müddəti 12 aydır və aylıq ödənişlər 8 faizdən başlayır. Əgər müştəri 50 000 manatlıq əmanət yatırırsa və müddət 12 aylıqdırsa, illik faiz dərəcəsi ilə hər ay 333 manat faiz gəliri əldə edəcək. Dollarla olan əmanətlərin aylıq ödənişi 1 faizdən başlayır. Müddətin sonunda isə bu 1.25 faizlik ödənişə çevrilir.
Qeyd edək ki, hər iki paketdə 3 aya qədər 50 manatlıq və ya dollarlıq minimal əlavə etmək, o cümlədən müddəti avtomatik artırmaq mümkündür. Sığortalanma prosesi isə əmanət açılarkən olan qaydalara uyğun həyata keçirilir. Əgər məbləğ 300 000 manat olarsa, o zaman, hər biri 100 000 manat olmaqla vəsaiti 3 yerə ayırmaq mümkündür.
“Bank Respublika” ASC
Öz müştərilərinə iki əmanət növü təklif edir. “Faydalı Yığım” adlanan növdə həm kiçik məbləğlə əmanət açmaq, həm də daha sonra aylıq əlavələr etməklə həmin məbləği artırmaq mümkündür. Müştəri öz istəyindən asılı olaraq həm manatla, həm də dollarla yatırım edə bilər.
Bununla yanaşı, həm ilk məbləğə, həm əlavə yatırımlara faizlər hesablanır, həm də sonda faizlərdən əlavə “faydalı bonus” qazanmaq imkanı da yaradılır.
Belə ki, əmanətin müddəti 6-36 ay arasında dəyişir. Faizlərin ödənilməsi isə yalnız müddətin sonunda baş tutur. İlkin əmanət məbləği 50 manatdan və ya dollardan başlayır. Yatırım məbləği aylıq minimum 10 AZN/USD, maksimum 5 000 AZN/USD təşkil edir. Bank 90 günə qədər əmanətin artırılmasına imkan tanıyır. Əmanətlər isə Əmanətlərin Sığortalanması Fondu tərəfindən sığortalanır.
“Müddətli əmanət” adlanan paketdə əmanətin maksimum müddəti 36 ay, manatla maksimum qazanc 10 faiz, dollarla isə 3.0 faiz təşkil edir.
“Azərbaycan Beynəlxalq Bankı” ASC
Öz müştərilərinə “Klassik əmanət” adlı paket təklif edir. Bu paketdə minimum məbləğ 500 AZN/USD təşkil edir və müddəti 1-3 il arasında dəyişir. Faizlər iki dəfə - ayın və ya ilin sonunda hesablanır. Əmanət məbləğinin artırılması isə nəzərdə tutulmur. Ancaq müddətin uzadılması əmanət müddəti bitdikdə həmin tarixə qüvvədə olan şərtlərlə avtomatik həyata keçirilir.
Əmanətlər 12-36 arasında ödənilir.
Bildirək ki, bu bankda əmanətlər aşağıdakı şərtlərə sığortalanır:
- 2 mart 2016-cı il tarixindən əvvəl: məbləği 30 000 manatadək - illik faiz dərəcəsi milli valyutada 15 %-dək, xarici valyutada 12%-dək olan əmanətlər sığortalanır.
- 2 mart 2016-cı il tarixindən 1 iyul 2019-cu il tarixədək: illik faiz dərəcəsi xarici valyutada 3%-dək və milli valyutada – 15%-dək olan əmanətlər tam şəkildə sığortalanır.
- 1 iyul 2019-cu il tarixindən 1 iyun 2020-ci il tarixindək: illik faiz dərəcəsi xarici valyutada 2.5%-dək və milli valyutada – 10%-dək olan əmanətlər tam şəkildə sığortalanır.
- 1 iyun 2020-ci il tarixindən: illik faiz dərəcəsi xarici valyutada 2.5%-dək və milli valyutada – 12%-dək olan əmanətlər tam şəkildə sığortalanır.
- 18 dekabr 2020-ci il tarixində qüvvəyə minmiş müvafiq qanunvericiliyə əsasən, 5 aprel 2021-ci il tarixindən hər bir iştirakçı bankda sığortalanmış əmanət üzrə əmanətin 100 faizi həcmində (100 min manatdan çox olmamaq şərtilə) kompensasiya ödənilir.
“Paşa Bank” ASC
Öz müştərilərinə təklif etdiyi “Müddətli depozit” paketində 3 valyuta ilə - AZN, EURO və USD yatırım etmək mümkündür. Minimal məbləğ 20 000 manatdan, hətta dollar və avrodan başlayır. Müddəti 1 aydan 36 aya kimidir. Faiz dərəcəsi depozitin valyutası, müddəti və faizlərin alınması sxemindən asılı olaraq müştəri ilə fərdi razılaşma əsasında təyin edilir.
Faizlərin ödənişi isə müştərinin seçiminə əsasən hesablanır, aylıq, rüblük və ya müddətin sonunda müştərinin cari hesabına köçürülür. Əgər müştəri vaxtından əvvəl depozitin tam məbləğini və ya onun bir hissəsini geri götürərsə, müqaviləyə xitam verilir.
Rövşən Ziya, Bizim.Media
