Cəlilabad şəhərində çirkab suları küçəyə axır.
Bizim.Media-nın Cənub bürosu xəbər verir ki, sözügedən vəziyyət şəhərin Qurtuluş küçəsində yaşanır.
Sakinlərin sözlərinə görə, artıq bir müddətdir ki, küçədəki kanalizasiya xətləri tutulub:
"Bu səbəbdən də xəttə axan çirkab suları daşaraq küçədə üzüaşağı axır. Küçədə antisanitar vəziyyət yaranıb. Küçə boyu onlarla ticarət obyektləri fəaliyyət göstərir. Küçəyə axan isə həmin obyektlərin çirkab sularıdır".
Məsələ ilə bağlı Cəlilabad Su-kanal Sahəsindən bildirildi ki, sözügedən kanalizasiya xətti yağış suları üçün nəzərdə tutulsa da, artıq istismar müddətini başa vurub:
“Bu səbəbdən şəhərə yeni kanalizasiya xətləri çəkilib. Mövcud problemin aradan qalxması üçün ərazidə fəaliyyət göstərən obyektlərin sahibləri aidiyyəti üzrə müraciət edib, texniki şərt almalıdırlar. Bundan sonra yeni abonentlər şəhərə çəkilmiş kanalizasiya xəttinə qoşulacaqlar.
Elşən Feyzullayev, Bizim.Media, Cənub bürosu
