Ənənəvi olaraq Azərbaycanda, Bakıda keçirilən Türk Dünyası Ədəbiyyat və Kitab Festivalı bu dəfə qardaş Özbəkistanda reallaşıb. Türk xalqlarının mənəvi irsinin nümayiş etdirilməsi, ortaq mədəni dəyərlərin təbliği, eləcə də şair, yazıçı və gənclər arasında əməkdaşlığın möhkəmləndirilməsi məqsədilə təşkil olunan VII Türk Dünyası Ədəbiyyat və Kitab Festivalı böyük təntənə ilə baş tutub.
Bizim.Media xəbər verir ki, tədbirin Buxara hissəsi Buxara Dövlət Pedaqoji İnstitutunda təşkil olunub.
Festivalda Özbəkistanla yanaşı Azərbaycan, Türkiyə, Qazaxıstan, Qırğızıstan, Türkmənistan, Macarıstan və Şimali Kipr Türk Cümhuriyyətindən gələn tanınmış ədib, şair, alim, təhsil və mədəniyyət xadimləri iştirak ediblər.
Açılış mərasimində Buxara Dövlət Pedaqoji İnstitutunun rektoru Bahadur Mamurov çıxış edərək, festivalın türk xalqları arasında ədəbi-mədəni əlaqələrin inkişafındakı əhəmiyyətini vurğulayıb.
Keçirilən panellərdə və məruzələrdə tanınmış ziyalılar ortaq mənəvi dəyərlərin qorunmasından söz açıblar:
Beynəlxalq Türk Müəllifləri Birliyinin sədri, Azərbaycan Yazıçılar Birliyinin mətbuat katibi, şair Xəyal Rza çıxışında türk coğrafiyasını birləşdirən mənəvi bağların təməlində məhz ortaq söz və ədəbiyyat xəzinəsinin dayandığını diqqətə çatdırıb.
Buxara Dövlət Universitetinin rektoru Abidcan Həmidov çıxışında belə beynəlxalq tədbirlərin mədəni, ədəbi əlaqələrlə yanaşı dostluq, qardaşlıq münasibətlərinin möhkəmlənməsində mühüm rol oynadığını diqqətə çatdırıb.
Beynəlxalq Türk Müəllifləri Birliyinin Asiya təmsilçisi, türkiyəli yazıçı və şair Mahmut Özkoca çıxışında türk coğrafiyasındakı yazarlar arasında canlı yaradıcılıq körpülərinin qurulmasının və bu əlaqələrin sistemli müstəviyə keçirilməsinin vacibliyini önə çəkib.
Asiya Texnologiyalar Universitetinin rektorunun müşaviri, Beynəlxalq Türk Müəllifləri Birliyinin koordinatoru Aytən Qurbanova, Özbəkistan Yazıçılar Birliyinin Buxara vilayət bölməsinin rəhbəri Şadman Süleymanov və “Qorovulbozor tongi” qəzetinin baş redaktoru Bəhram Soliyev elmi, ədəbi və mədəni əlaqələrin inkişafı barədə fikirlərini bölüşüblər.
Buxaradakı tədbirlər İnstitutun “Gənclər bağı”nda təşkil olunan poeziya gecəsi ilə davam edib. Gecədə Türkiyənin tanınmış şair və jurnalisti Mahmut Özkoca, Azərbaycandan Beynəlxalq Türk Müəllifləri Birliyinin sədri, şair Xəyal Rza, sənətşünaslıq üzrə fəlsəfə doktoru, şair Bəhruz Niftəliyev şeirlərini səsləndiriblər.
Buxaradakı tədbirlərə qədim qala divarları ilə əhatələnmiş İçərişəhərdə keçirilən kitab sərgisi və konsert proqramı ilə yekun vurulub.
Festivalın növbəti mərhələsi 2700 illik zəngin tarixə malik qədim Qarşı şəhərində reallaşıb. Tədbirin bu şəhərdəki ilk günü olduqca zəngin və rəngarəng proqramla yadda qalıb.
Asiya Texnologiyalar Universitetində keçirilən təntənəli açılış mərasimində təhsil ocağının rektoru Laçın Rəhimov çıxış edərək, belə mötəbər beynəlxalq festivala ev sahibliyi etməkdən qürur duyduqlarını bildirib. Rektor vurğulayıb ki, müasir dövrdə gənclərin mənəvi dünyasının zənginləşməsi, kitaba və ədəbiyyata sevginin artırılması prioritet məsələdir və bu festival türk dünyası gəncliyinin mədəni inteqrasiyasına mühüm töhfə verir.
Açılışda çıxış edən Beynəlxalq Türk Müəllifləri Birliyinin sədri, Azərbaycan Yazıçılar Birliyinin mətbuat katibi, şair Xəyal Rza festivalın coğrafiyasının genişlənməsinin türk birliyinin bariz mənəvi təzahürü olduğunu qeyd edib. O, Qarşı şəhərində yaradılan bu zəngin ədəbi mühitin xalqlarımız arasında qardaşlıq tellərini daha da möhkəmləndirdiyini, müştərək layihələrin davamlılığının vacibliyini diqqətə çatdırıb.
Tədbirdə Azərbaycan Dövlət Pedaqoji Universitetinin Quba filialının direktoru Yusif Əliyev, Türkiyənin tanınmış şair və jurnalisti Mahmut Özkoca, Asiya Texnologiyalar Universitetinin rektorunun müşaviri Aytən Qurbanova, özbəkistanlı şair Nəfəs Şadmanov, azərbaycanlı şair Bəhruz Niftəliyev və digər natiqlər türk dünyasında ədəbi-mədəni əlaqələrin perspektivləri barədə dəyərli mülahizələrini bölüşüblər.
Açılış mərasimindən sonra festival müxtəlif mövzularda təşkil olunan panel iclasları ilə işini davam etdirib. Panellərdə Azərbaycandan və Özbəkistandan olan tanınmış alimlərin elmi məruzələri dinlənilib, türk xalqlarının ortaq ədəbi irsi və müasir ədəbi proseslər ətrafında geniş fikir mübadiləsi aparılıb.
Tədbirin bədii hissəsində Özbəkistanda təhsil alan azərbaycanlı tələbələrin hazırladığı maraqlı konsert proqramı təqdim olunub. Tələbələrin ifasında səslənən musiqi və şeir nümunələri iştirakçılar tərəfindən böyük rəğbətlə qarşılanıb.
Qeyd etmək lazımdır ki, silsilə xarakter daşıyan bu möhtəşəm festivalın sayca 5-ci tədbiri bundan əvvəl Türkiyənin Qaziantep şəhərində Şəhidkamil bələdiyyəsinin yüksək təşkilatçılığı ilə uğurla həyata keçirilmişdi. Genişmiqyaslı layihə çərçivəsində panellər və mədəni tədbirlər davam edir.
Bizim.Media
