Argentina milli komandasının baş məşqçisi Lionel Skaloni Lionel Messinin beynəlxalq karyerasını başa vurmasından sonra əfsanəvi 10 nömrəli formanı yarımmüdafiəçi Niko Pasa həvalə etməyi planlaşdırır.
Bizim.Media xəbər verir ki, bu barədə "ESPN Argentina"nın jurnalisti və insayderi Federiko Bueno məlumat yayıb.
İtaliyanın "Komo" klubunun 21 yaşlı yarımmüdafiəçisi milli komandanın digər ulduz futbolçularını geridə qoyaraq bu rol üçün əsas namizəd seçilib. Kult formanın təhvil verilməsi ilə bağlı daxili qərar birbaşa məşqçilər korpusunun gələcəyi ilə bağlıdır — yaxın aylarda tərəflərin Skaloni ilə müqavilənin 2030-cu ilə qədər uzadılmasını müzakirə edəcəyi gözlənilir.
Niko Pas bundan əvvəl Argentina millisində 18 nömrə altında çıxış etsə də, klub səviyyəsində artıq 10 nömrə ilə özünü doğruldub. O, keçən mövsüm 13 qol və 7 məhsuldar ötürmə ilə yadda qalaraq "Komo"nun Çempionlar Liqasına vəsiqə qazanmasına kömək edib.
Xatırladaq ki, Lionel Messi Argentina millisində 17 il ərzində 10 nömrəli formanı geyinib. O, bu formanı ilk dəfə 2009-cu ilin martında, komandaya Diyeqo Maradonanın rəhbərlik etdiyi dövrdə geyinmişdi.
Bizim.Media
