Ticarət kəsiri rekord HƏDDƏ ÇATDI: Aİ Çinə yeni məhdudiyyətlər hazırlayır

Avropa İttifaqı Çin idxalının kəskin artması və bunun Avropa sənayesinə təzyiqi gücləndirməsi səbəbindən Pekinə qarşı ticarət siyasətini sərtləşdirmək niyyətindədir.

Bizim.Media xəbər verir ki, bu barədə Polşa Beynəlxalq Münasibətlər İnstitutu (PISM) məlumat yayıb.

Bildirilib ki, 2025-ci ildə Aİ-nin Çinlə ticarətində kəsir rekord həddə — 360 milyard avroya çatıb.

Bu fonda Avropa liderləri müdafiə mexanizmlərindən daha fəal istifadə etmək və ayrı-ayrı ixracatçıların Aİ vahid bazarına çıxışını operativ şəkildə məhdudlaşdırmağa imkan verən yeni alətlər hazırlamaq barədə razılığa gəliblər.

Avropa Komissiyasının dekabrda ayrı-ayrı təchizatçılardan asılılığı azaltmağa yönəlmiş “DiversifyEU” təşəbbüsünü təqdim etməsi gözlənilir.

PISM hesab edir ki, Çin idxalının artması Avropa müəssisələrinin bağlanmasına, iş yerlərinin itirilməsinə və Çin məhsullarından asılılığın güclənməsinə səbəb ola bilər.

İnstitutun qiymətləndirməsinə görə, Pekin cavab olaraq nadir torpaq metalları da daxil olmaqla ixraca nəzarəti gücləndirə və ya Avropa mallarına gömrük rüsumlarını artıra bilər. Bu isə Aİ ilə Çin arasında ticarət müharibəsi riskini artırır.

Bizim.Media