Alimlər pinqvinlərin Antarktidada buzun əriməsinə təsirini üzə çıxarıblar. Məlum olub ki, quşların ifrazatı qar səthində mikroskopik yosunların sürətlə çoxalmasına səbəb olur.
Bizim.Media-nın məlumatına görə, pinqvinlərin ifrazatında olan fosfatlar və digər qida maddələri yosunların inkişafını stimullaşdırır. Nəticədə qar və buz yaşıl rəng alır və Günəş enerjisini daha çox udmağa başlayır.
Tədqiqatçıların məlumatına görə, yosunların təsiri ilə qırmızı qar təmiz ağ qarla müqayisədə təxminən 20 faiz, yaşıl qar isə 40 faiz daha çox Günəş enerjisi udur. Bu isə qar örtüyünün daha çox isinməsinə və daha sürətlə əriməsinə səbəb olur.
Araşdırma çərçivəsində mütəxəssislər Qərbi Antarktika yarımadasının sahilləri boyunca, həm pinqvin koloniyalarının yaxınlığından, həm də onlardan uzaq ərazilərdən qırmızı və yaşıl qar nümunələri toplayıblar.
Laboratoriya təhlilləri yaşıl qarda yosunları qidalandıran fosfatların daha çox olduğunu göstərib.
Kolorado Universitetinin Boulderdəki bölməsindən tədqiqatın rəhbəri Aliya Xan quşların ifrazatının güclü gübrə rolunu oynadığını bildirib.
Bu maddələr buzlaqların səthində yaşıl yosunların sıx toplanmasına şərait yaradır. Alimlər xəbərdarlıq edirlər ki, qlobal istiləşmə davam etdikcə qar yosunlarının yayılma arealı əhəmiyyətli dərəcədə genişlənə bilər.
Bizim.Media
