İnsan biznesdə və ya karyerasında uğur qazandıqda ən xoş imkanlardan biri valideynlərinə təşəkkür etmək və onlara həqiqətən bahalı bir hədiyyə almaqdır. Çünki peşəkar uğurların arxasında çox vaxt ən yaxın insanların illərlə davam edən dəstəyi, qayğısı və inamı dayanır. Lakin bəzən belə hədiyyələr zaman keçdikcə məyusluq səbəbinə çevrilə bilər.
Bizim.Media “Tom’s Hardware” nəşrinə istinadən xəbər verir ki, “Nvidia” şirkətinin baş direktoru Censen Huan bu yaxınlarda ən böyük maliyyə səhvlərindən birinin 1999-cu ildə, şirkətinin ilk dəfə açıq səhmlər bazarına çıxması zamanı baş verdiyini etiraf edib.
Həmin vaxt iş adamı valideynlərinə bahalı “Mercedes-Benz S-Class” almaq üçün səhm portfelinin bir hissəsini satıb.
Huan xatırladıb ki, həmin dövrdə “Nvidia” şirkətinin ümumi dəyəri 300 milyon dollar idi. Görünür, o zaman bu, sahibkar üçün inanılmaz uğur kimi görünürdü.
“Valideynlərimə yaxşı bir şey almaq istəyirdim. Buna görə “Nvidia” səhmlərini satıb onlara “Mercedes S-Class” aldım. Bu, dünyanın ən bahalı avtomobilidir. Onlar buna görə peşmandırlar”, deyə Huan bildirib.
İş adamının sözləri səhm bazarından uzaq insanlar üçün anlaşılmaz görünə bilər. Lakin bu sahəni yaxşı bilənlər onun nəyi nəzərdə tutduğunu anlayırlar.
Nəşrin qeyd etdiyi kimi, 1999-cu ildə “Mercedes S-Class”ın ən bahalı versiyaları təxminən 135 min dollara başa gələ bilərdi. Huanın avtomobilin pulunu tamamilə səhmlər hesabına ödədiyini düşünsək, o zaman onun hər səhm üçün 12 dollar olmaqla təxminən 11 250 səhm satmalı olduğu ehtimal edilir. Məhz burada həm Huanın, həm də valideynlərinin avtomobilin alınmasına görə niyə peşman olduğu aydınlaşır.
Məsələ ondadır ki, 1999-cu ildən etibarən “Nvidia” bir neçə dəfə səhmlərin bölünməsini həyata keçirib.
Bu zaman bir səhm faktiki olaraq bir neçə yeni səhmə çevrilir. Eyni zamanda şirkətin səhmlərinin qiyməti də əhəmiyyətli dərəcədə artıb.
Beləliklə, Huanın təxminən 135 min dollara satdığı ilkin 11 min səhm bu gün təxminən 5,4 milyon səhmə çevrilmiş olardı. Hər birinin qiyməti 230 dollar hesablandıqda, onların ümumi dəyəri 1,2 milyard dollardan çox olardı.
Beləliklə, 1999-cu ildə valideynlərinə alınan “Mercedes” Huan üçün 1 milyard dollardan çox itirilmiş gəlir bahasına başa gəlib. Bununla belə, hətta dünyanın ən bahalı avtomobilinin alınması “Nvidia” şirkətinin baş direktoru üçün nisbətən kiçik itki sayılır. Hazırda Censen Huanın şəxsi sərvəti təxminən 200 milyard dollar qiymətləndirilir və bu, onu planetin ən varlı on insanından birinə çevirir. (qaynarinfo.az)
Bizim.Media
