Kanar adalarına getmək istəyənlərin NƏZƏRİNƏ: Toz fırtınaları təhlükəli həddə çatıb – FOTO

Avropalı turistlərin sevimli istirahət məkanlarından olan Kanar adaları getdikcə daha tez-tez Sahara səhrasından gələn toz fırtınalarının təsirinə məruz qalır.

Bizim.Media xəbər verir ki, Express nəşrinin yaydığı məlumata əsasən, "kalima" adlanan bu təbiət hadisəsi artıq ildə 146 gün, yəni ilin təxminən 40 faizində müşahidə olunur.

Alimlər bildirirlər ki, son on ildə Afrikadan Cənubi Avropaya daşınan tozun həcmi 10–25 faiz artıb. Bu tendensiya iqlim dəyişikliyi ilə əlaqələndirilir.

Həkimlər xəbərdarlıq edirlər ki, Sahara tozunun yüksək konsentrasiyası həm yerli sakinlər, həm də turistlər üçün ciddi sağlamlıq riski yaradır. Araşdırmalara görə, bu cür toz fırtınaları tənəffüs sistemi və ürək-damar xəstəliklərinin ağırlaşmasına, həmçinin hospitalizasiya və ölüm hallarının artmasına səbəb ola bilər.