Almaniyada Hitleri tərifləyən şəxs məhkəmə qarşısına çıxacaq - FOTO

Almaniyanın Münster şəhərində 58 yaşlı Niderland vətəndaşı Stefan Viykamp barəsində nifrətin qızışdırılması maddəsi ilə irəli sürülən ittiham üzrə məhkəmə prosesi keçiriləcək.

Bizim.Media xəbər verir ki, alman mətbuatı xarici görünüşünə və Adolf Hitlerə açıq simpatiyasına görə onu "Hollandiyalı Hitler" adlandırır.
 

Prokurorluğun məlumatına görə, Viykamp Münster şəhərinin baş dəmiryolu vağzalı yaxınlığında keçirilən aksiyada verdiyi müsahibədə Adolf Hitleri "dahi" adlandıraraq onu tərifləyib. Məhz bu açıqlamalar cinayət işi açılması üçün əsas olub.

Məlumata görə, Viykamp sağ radikal dairələrdə tanınan şəxsdir. O, Almaniyada neonasist tədbirlərində iştirak edib, fəaliyyəti dayandırılmış Die Rechte partiyasının üzvü olub və daha əvvəl SS simvollarından istifadə etdiyi üçün işini itirib.

Almaniya qanunvericiliyinə əsasən, nasizmin açıq şəkildə təbliği və ya bəraət qazandırılması cərimə və ya üç ilədək azadlıqdan məhrumetmə cəzası ilə nəticələnə bilər. Təqsirləndirilən şəxs məhkəməyə gəlməyəcəyi təqdirdə, məhkəmə onun barəsində qiyabi qərar çıxara və ya həbs orderi verə bilər.