Kolumbiyada prezident seçkiləri: Trampın pərəstişkarı ikinci turda mübarizə aparacaq

Kolumbiyada keçirilən prezident seçkilərinin birinci turunda sağ radikal hüquqşünas Abelardo de la Espriella liderlik edir. İkinci turda o, sol mərkəzçi Prezident Qustavo Petronun dəstəklədiyi senator İvan Sepeda ilə qarşılaşacaq.

Bizim.Media xəbər verir ki, bu barədə məlumat Kolumbiya Milli Vətəndaşlıq Vəziyyəti Reyestrinin rəsmi saytında yer alıb.
 

Səsvermə bülletenlərinin 99,97%-i hesablandıqdan sonra müxalifətin namizədi və Donald Trampın pərəstişkarı olan Espriella 43,7% (10,3 milyondan çox səs), Sepeda isə 40,9% (təxminən 9,6 milyon səs) toplayıb.

Ölkənin hazırkı Prezidenti Qustavo Petro ilkin nəticələri qəbul etmədiyini açıqlayıb. Dövlət başçısı "X" sosial şəbəkə hesabında yazıb:

"Prezident olaraq mən Bautista qardaşlarına məxsus özəl şirkətin apardığı ilkin hesablamanın nəticələrini tanımıram".

Petronun iddialarına görə, səsvermə alqoritmləri bir həftə ərzində üç dəfə dəyişdirilib, rəsmi siyahıdan kənar isə sistemə 800 min saxta identifikasiya nömrəsi əlavə olunub. O, yalnız Milli Seçki Şurasının keçirəcəyi rəsmi yoxlamanın nəticələrini qəbul edəcəyini bəyan edib.

Reyestrin keçmiş rəhbəri Xuan Karlos Qalindo Vaça (Juan Carlos Galindo Vacha) prezidentin bu bəyanatlarını "dezinformasiya" adlandırıb.

O qeyd edib ki, ilkin hesablama ilə rəsmi nəticələr arasındakı fərq adətən 1%-dən çox olmur. Bununla belə, senator Sepeda da prezidentin mövqeyini dəstəkləyərək bəzi seçki məntəqələrində "qeyri-adi səsvermə modellərinin" müşahidə olunduğunu bildirib.

Seçkilərin ikinci turu iyunun 21-nə təyin edilib. Kolumbiyanın yeni prezidentinin andiçmə (inaqurasiya) mərasimi isə avqustun 7-də baş tutacaq.

Bizim.Media