Avropa ölkələrində pensiya məbləğləri arasında böyük fərqlər var.
Bizim.Media xəbər verir ki, Euronews-un Business bölməsində dərc olunan son araşdırmaya əsasən, aylıq orta pensiya göstəricilərinə görə lider ölkələr əsasən Şimal və Qərbi Avropadadır.
Məlumata görə, Avropa İttifaqında aylıq orta pensiya təxminən 1 443 avro təşkil edir. Lakin bəzi ölkələr bu göstəricini xeyli üstələyir.
Aİ daxilində ən yüksək aylıq pensiya Lüksemburqda qeydə alınıb – burada orta pensiya 2 200–2 500 avro civarındadır. Şimal ölkələri də yüksək göstəricilərlə seçilir. Norveç, Danimarka və İslandiyada aylıq pensiyalar təxminən 1 800–2 700 avro aralığındadır.
Böyük iqtisadiyyatlara malik ölkələrdə də pensiyalar Aİ ortalamasından yuxarıdır. İtaliyada aylıq orta pensiya təxminən 1 560 avro, Fransa və İspaniyada isə 1 400–1 450 avro civarındadır. Almaniyada da göstərici bu səviyyəyə yaxındır.
Ən aşağı pensiyalar isə Şərqi və Balkan ölkələrində qeydə alınır. Məsələn, Bolqarıstanda aylıq orta pensiya təxminən 220–250 avro təşkil edir. Bəzi Balkan ölkələrində isə bu məbləğ 200–500 avro aralığındadır.
Araşdırma göstərir ki, Avropada ən yüksək və ən aşağı aylıq pensiya arasında fərq on dəfəyə qədər çatır. Ekspertlər bildirirlər ki, bu fərqlər ölkələrin iqtisadi gücü, sosial təminat sistemi və əmək bazarındakı maaş səviyyələri ilə birbaşa bağlıdır.
Euronews-un təqdim etdiyi məlumatlar son illərin Eurostat statistik göstəricilərinə əsaslanır.
Bizim.Media
