Sevgililər Günü bu ölkələrdə keçirilmir: Niyə QƏTİ QADAĞANDIR?

Müqəddəs Valentin Günü olduqca qədim tarixə malikdir. Onun yaşı 16 əsrdən çoxdur və başlanğıcını hələ qədim Roma dövründə keçirilən Luperkaliya festivalından götürür. Qərbi Avropada kütləvi şəkildə qeyd olunması ənənəsi XIII əsrdə möhkəmlənib, ABŞ-da isə bu gün rəsmi olaraq 1777-ci ildən etibarən qeydə alınıb. Uzun müddət ərzində bu bayram təkamül edib və bu gün əksər ölkələrdə sevgi mövzusuna həsr olunmuş populyar dünyəvi hadisə kimi qəbul olunur.

Bizim.Media xəbər verir ki, qlobal populyarlığına baxmayaraq, dünyanın bir çox yerlərində bu gün hələ də yerli dini normalar və ya mədəni ənənələr üçün təhlükə kimi qiymətləndirilir.

Bəzi dövlətlərdə rəsmi hakimiyyət bayramın atributlarında Qərb həyat tərzinin təhlükəli təbliğini görür və bu da sərt məhdudiyyətlərə səbəb olur. Nəticədə, bəzi ölkələrdə Sevgililər Günü ciddi qadağa altındadır və ya ağır təqiblərlə müşayiət olunur: 14 fevralda gül hədiyyə etməyə cəhd belə insanı həbsə sala bilər.

Pakistan: Ali Məhkəmə səviyyəsində qadağa

Pakistanda bu bayram ciddi siyasi və məhkəmə mübahisələrinə səbəb olub və nəticədə ölkənin Ali Məhkəməsi səviyyəsində rəsmi şəkildə qadağan edilib. Hər şey keçmiş prezident Məmmun Hüseynin vətəndaşları bayramı qeyd etməkdən imtina etməyə açıq şəkildə çağırması ilə başlayıb: o bildirirdi ki, bu günün milli mədəniyyətlə heç bir əlaqəsi yoxdur. Bunun ardınca sərt məhdudiyyətlər tətbiq olundu: bütün ictimai məkanlardan bayramla bağlı istənilən simvolların yığışdırılması tələb edildi, KİV-ə isə bu gün haqqında hətta bəhs etmək belə qadağan olundu.

Polis nəzarətinin davamlı olmasına baxmayaraq bir çox pakistanlılar yenə də hüquq-mühafizə orqanlarından gizlənərək gizli şəkildə gül və hədiyyələr təqdim etməyə çalışırlar.

Malayziya: İslam qaydalarına ziddiyyət

Oxşar vəziyyət Malayziyada da müşahidə olunur. Burada dövlət hakimiyyəti 2005-ci ildən etibarən Sevgililər Gününə qarşı fəal mübarizə aparır. Milli İslam Şurası bu bayramın xristian mənşəyinə görə dini normalara zidd olduğunu bildirən fərman verib. Xristian icmalarının nümayəndələri müasir bayramın artıq çoxdan dini məzmununu itirdiyini sübut etməyə çalışsalar da, hökumət mövqeyində qəti qalıb. Ölkədə park və ya hotellərdə bu günü qeyd etməyə cəsarət edən cütlükləri aşkar edib saxlamaq məqsədilə mütəmadi xüsusi reydlər keçirilir ki, bu da 14 fevralın ab-havasını son dərəcə gərgin edir.

İran: “Qərb tənəzzülünə” qarşı mübarizə

İranda Müqəddəs Valentin Gününə münasibət daha sərtdir, çünki o, rəsmi şəkildə əxlaqsızlığın və Qərb mədəniyyətinin tənəzzülünün simvolu elan olunub. Dövlət bayram simvolikası olan hər hansı məhsulların satışını qəti şəkildə qadağan edib, dini liderlər isə vətəndaşları qayda pozuntularını aşkar etməyə çağırırlar. Alternativ olaraq gənclərə sevgi və sədaqət ilahəsinə həsr olunmuş qədim fars bayramı Sepandərməzqan təklif olunur. Lakin bütün qadağalara baxmayaraq Qərb bayramının iranlılar arasında populyarlığı o qədər yüksəkdir ki, bir çoxları
rəsmi xəbərdarlıqları nəzərə almadan 14 fevralda sevdiklərini təbrik etməyə davam edirlər.

Hindistan: radikal etirazlar və qəribə təşəbbüslər

Hindistanda vəziyyət bir qədər fərqlidir. Rəsmi dövlət qadağası olmasa da, aşiq cütlüklər adətən radikal qrupların hücumlarına məruz qalırlar. Ekstremistlər aqressiv etiraz aksiyaları keçirir, cütlükləri ictimai şəkildə alçalda və hətta məcburi nikahla hədələyə bilirlər. Hisslərini açıq şəkildə göstərən gənclərin zorla saçlarının kəsildiyi hallar da qeydə alınıb. 2023-cü ildə hakimiyyət bayramın adını “İnəkləri qucaqlama günü” ilə əvəz etməyə cəhd göstərərək diqqəti yerli ənənələrə yönəltmək istəyib. Lakin sosial şəbəkələrdə istehza dalğasından sonra bu təşəbbüs ləğv edildi.

Səudiyyə Ərəbistanı: sərt qadağadan liberallaşmaya

Bu siyahıda xüsusi yer Səudiyyə Ərəbistanına məxsusdur: burada son illərdə vəziyyət liberallaşma istiqamətində dəyişməyə başlayıb. Uzun müddət ərzində Müqəddəs Valentin Günü ciddi şəkildə qadağan olunmuşdu və dini polis mağazalarda qırmızı güllər yaxud ürək simvollarının satışına nəzarət edirdi. Qayda pozanları həbs gözləyirdi, bayram malları isə yalnız qara bazarda satılırdı. Lakin vəliəhd şahzadə Məhəmməd bin Salmanın islahatları nəticəsində dini polisin səlahiyyətləri əhəmiyyətli dərəcədə məhdudlaşdırıldı və bu gün ölkə sakinləri Sevgililər Gününü dövlət təqibindən çəkinmədən sərbəst və açıq şəkildə qeyd edə bilirlər. (lent.az)

Bizim.Media