Ukrayna prezidenti Volodimir Zelenski ABŞ-dakı keçmiş Ukrayna səfiri Oksana Markarovanı Ukraynanın bərpası və investisiyalar üzrə öz müşaviri təyin edib.
Bizim.Media xəbər verir ki, bu barədə Zelenski Telegram-da yazıb.
“Bu gündən etibarən Oksana Markarova dövlətimizə Ukraynanın bərpası və investisiyalar məsələləri üzrə mənim müşavirim kimi kömək etməyə davam edəcək”, – prezident bildirib.
O, qeyd edib ki, artıq 4 ildir Ukrayna Rusiya aqressiyasına qarşı mübarizə aparır, buna görə də əsas vəzifə ölkəni lazım olan silahlarla, HHM sistemləri ilə və daxili dayanıqlıq üçün kifayət qədər resursla təmin etməkdir. Lakin Ukraynanın gündəlik olaraq sağ qalması üçün görülən işlərlə yanaşı, uzunmüddətli məqsəd də mövcuddur – müharibə bitdikdən sonra Ukraynanın yenidən qurulmasını və normal iqtisadi inkişafın bərpasını təmin etmək. Prezident vurğulayıb ki, bu, Ukrayna hökuməti, bütün institutlar və Ukrayna biznesi üçün mühüm vəzifədir.
“Sevinirəm ki, Oksana dövlət komandasında qalır və onun yeni vəzifələri Ukraynanı gücləndirən məsələlər üzrə məsləhətləşmələri əhatə edəcək – yəni daha yaxşı biznes mühiti, dövlətimizin maliyyə dayanıqlığının artırılması, investisiyaların cəlb edilməsi və strateji tərəfdaşlarımızla birlikdə bərpa planlaşdırılması”, – Zelenski əlavə edib.
Bizim.Media
