Azərbaycanlı “qanuni oğru”nun titulunu almaq istəyirlər

Hazırda oxunan: Azərbaycanlı “qanuni oğru”nun titulunu almaq istəyirlər

30410

Xəbərləri Google-da birbaşa bizim.media-dan alın Google-da bizim.media-ya abunə ol Google axtarışında bizim.media-nı seçilmiş mənbə kimi əlavə edin Abunə ol

Bu ilin yanvar ayının 16-da Moskvada öldürülən Rusiya kriminal aləminin “xaç atası” Aslan Usoyan (“Ded Xasan”) tərəfdarları yenidən hərəkətə keçiblər. “Ded” in taxt-tacına tam mənada sahib çıxa bilməyən klan dağınıq halda da olsa Rusiya kriminalına təsir güclərini saxlamaq niyyətindədirlər. Ona görə də müxtəlif ölkələrdə tez-tez “oğru toplantısı” (“sxodka”)keçirən “Ded” tərəfdarları sıralarını möhkəmləndirirlər. Amma bununla yanaşı başqa bir proses də gedir: klana dönük olanların cəzalandırılması.

Məlumdur ki, Usoyanın sağlığında onun klanında əsas söz sahiblərindən biri də azərbaycanlı “qanuni oğrular” idi. Rusiya mətbuatı yazır ki, “Ded”in qətlindən sonra azərbaycanlı avtoritetlər (“Sumqayıtlı Arif”, “Gürcüstanlı Vaqif”, “Qoca”, “Yasamallı Yunus”, Baxış Əliyev (“Vaxa”) və başqalarının bu klana daxil olduğu bildirilirdi) bu klandan uzaqlaşıblar. Onların sırasında isə Əlibala Həmidovun (“Yasamallı Qoca”)adı çəkilir. Rusiyanın primecreime.ru saytı yazır ki, bu yaxınlarda həm “Ded”,həm də onların əleyhinə olan gürcü qruplaşmaları Yunanıstanda bir-birinin ardınca bir neçə “sxodka” keçiriblər.

58 yaşlı “qanuni oğru”, Kutaisidə doğulmasına baxmayaraq, “Ded Xasan”ın klanına daxil olan Dato Sebiskberidze 3 gürcü və bir azərbaycanlını taclandırıb. Bunun ardınca 56 yaşlı Tbilisidən olan Vaja Biqanişvili birdən-birə 9 nəfəri “oğru” elan edib: Paata, Mumuka, Nodar, Qiqu, İşxan, İrakli, Datio, Zviad və Zurik. Bu “sxodka”da Vajaya dəstək verənlər arasında Qiya Samtredski, Çiro Qalski və “Qoca Yasamallı” da olub.
“Qoca”nın bu “sxodka”da iştirakı “Ded” tərəfdarlarının narazılığına səbəb olub. Belə ki, bəzi “qanuni oğru”lar onun “Ded Xasan”ın ölümündən sonra onun qatı düşməni elan edilən azərbaycanlı “qanuni oğru” Rövşən Canıyevin (“Lənkəranski”) nüfuz dairəsinə daxil olmasını bağışlaya bilmirlər. Saytın iddiasına görə, Azərbaycandan olan bəzi “qanuni oğru”ların da iştirakı ilə (onların adı çəkilmir) belə bir qərar verilib ki, “Qoca”nın iştirak etdiyi “sxodka”ların nəticələri tanınmır və ondan “tac” alanlar “oğru” hesab edilmir.

Məlumata görə, artıq “Ded Xasan” klanı “Qoca”nın özünü tamamilə kənarlaşdırmaq üçün səylərini səfərbər edib.

“Ded” klanında yer alan “Qoca” ilə “Rövşən Lənkəranski” arasında uzun müddət həqiqətən də münasibətlər gərgin olub. Hətta belə məlumatlarda vardı ki, 2012-ci ilin noyabrında “Ded Xasan”ın rəhbərlik etdiyi “sxodka” da R.Canıyevin “oğru” adının alınması ilə bağlı qərarı Azərbaycan həbsxanalarına göndərilməsini (“praqon”) “Qoca” boynuna götürüb. Məlumat üçün deyək ki, kriminal aləmdə “Qoca” ləqəbi ilə tanınan Əlibala Həmidov ilk dəfə Azərbaycanda 1992-ci ildə adam öldürdüyünə görə 14 il azadlıqdan məhrum edilib və 2000-ci ildə azadlığa çıxıb. Bundan sonra Moskvaya gedib. Rusiyada da bir neçə dəfə həbs edilib.

Qeyd edək ki, bir müddət əvvəl “Lənkəranski”nin Dubayda olduğu və onunla bərabər, “qanuni oğru” “Yasamallı Qoca”nın da olduğu barədə xəbərlər yayılmışdı. O zaman bu mövzudan yazarkən qeyd etmişdik ki, “Ded Xasan”dan sonra kriminal aləmdə yaranmış çalxalanmada tərəf seçmək mərhələsi gəlib və ən nüfuzlu azərbaycanlı “qanuni oğru”lar “Lənkəranski”nin yanında yer alıblar.

Bu xəbərlər də təsdiq edir ki, azərbaycanlı avtoritetlərin “Lənkəranski”nin ətrafında toplaşması prosesi “Ded” klanını ciddi narahat edir. “Qoca”nın “oğru” adının alınması üçün başlanan proses bunu təsdiq edir.

© Materiallardan istifadə edərkən hiperlinklə istinad olunmalıdır.
Mətndə səhv varsa, onu qeyd edib ctrl + enter düyməsini basaraq bizə göndərin.