50 günə yetişdirdiyi ağacları biznesə çevirdi – Lənkəranlı fermerin bambuk “meşəsi” – FOTO

“Bir bambuk ağacının yetişdirilməsinə 48-50 gün vaxt sərf olunur”.

Bunu Azərbaycan Dövlət Turizm Agentliyinin Lənkəran şəhərinə təşkil etdiyi mediatur çərçivəsində Lənkəran rayonunun Talışlı kənd sakini, fərdi sahibkar Eynulla Calalov Bizim.Media-nin əməkdaşı ilə söhbətində deyib.

O, 32 sot həyətyanı sahədə mindən çox bambuk yetişdirdiyini bildirib:

"Cənub bölgəsinin təbiəti bu ağacın yetişdirilməsinə uyğundur. Mən də illər öncə bu işlə məşğul oldum və ölkədə bambuk yetişdirən ilk şəxsəm. Ağacları yetişdirəndən sonra onlardan sərgidə nümayiş olunması üçün müxtəlif əşyalar hazırladım. Ondan sonra mebellər, müxtəlif aksesuarlar sifariş olundu. O zamandan bunu ailə təsərrüfatına çevirmişik".

Qeyd edək ki, onun bambukdan düzəltdiyi əşyalar dəfələrlə rayonda keçirilən sənətkarlıq sərgilərində nümayiş etdirilib. O, bu işlərə görə fəxri fərmanlara diplomuna layiq görülüb.