“30 kq çəkisi olan məktəblinin çantası 3 kiloqramı keçməməlidir”

Məktəb çantasının çəkisi uşağın bədən çəkisinin 10-15 faizini keçməməlidir.

Bizim.Media xəbər verir ki, bunu Səhiyyə Nazirliyi Elmi-Tədqiqat Travmatologiya və Ortopediya İnstitutunun travmatoloq-ortopedi İlham Şıxbabayev nazirliyin sosial media hesabındakı canlı yayımda deyib.

Həkimin sözlərinə görə, 30 kiloqram çəkisi olan uşaq üçün məktəb çantasının çəkisi təxminən 3 kiloqram olmalıdır. Xüsusi hallarda bu göstərici 15 faizə qədər ola bilər.

"Həddindən artıq ağır məktəb çantası onurğaya ciddi yük salır. Onurğaya düşən yük normadan artıq olduqda bu, xroniki əzələ spazmlarına və ağrılara səbəb ola bilər. Məktəb çantası uşağın yaşına və boyuna uyğun olmalıdır.

Çanta iki çiyin qayışlı, qayışları isə enli olmalıdır. Onun ölçüsü normadan böyük olmamalı və bel nahiyəsinə qədər çatmalıdır. Məktəb çantasını daim bir çiyində daşımaq əzələ ağrılarına səbəb ola bilər. Ağır kitablar çantanın ön, yüngül dəftərlər isə arxa hissəsinə yerləşdirilməlidir", - həkim bildirib.

Fəridə, Bizim.Media