Şəhərin bəzi yeraltı keçidlərində eskalatorların işləməməsi məsələsi dəfələrlə gündəmə gətirilib. Növbəti belə şikayət Bakı Bulvarından Sahil istiqamətində yerləşən yeraltı keçidlə bağlıdır. Belə ki, keçiddəki eskalatorların heç biri işləmir.
Mövzuyla əlaqədar Azərbaycan Avtomobil Yolları Dövlət Agentliyinə (AAYDA) sorğu ünvanladıq. Agentliyin İctimaiyyətlə əlaqələr və kommunikasiya departamentinin müdiri Anar Nəcəfli Bizim.Media-nın sorğusuna cavab olaraq bildirib ki, eskalatorların ehtiyyat hissəsində problem yarandığı üçün işlək vəziyyətdə deyil:
"Həmin eskalatorlarda problem yaşanır. Çünki həmin eskalatorun ehtiyyat hissələrinin dəyişdirilməsinə ehtiyac var. Həmin hissə ölkəmizdə istehsal edilmədiyi üçün AAYDA tərəfindən sifariş edilib”.
Açıqlamada qeyd edilib ki, lazımi ehtiyyat hissə çatdırıldıqdan sonra sözügedən eskalator işlək vəziyyətə gətiriləcək.
Nəzrin Mirzəyeva, Bizim.Media
