Şagirdlər üçün yeni QİYMƏTLƏNDİRMƏ PROQRAMI – Yalnız seçilmiş məktəblərdə aparılacaq – RƏSMİ

“PISA 2029-un birinci mərhələsi 2026-cı ildən başlayıb. Hazırda sual çərçivələrinin hazırlanması prosesi gedir”.

Bunu elm və təhsil naziri Emin Əmrullayev "PISA 2025 – Şagird Qiymətləndirilməsi üzrə Beynəlxalq Proqram"ının nəticələrinin təqdimatında Bizim.Media-nın sualını cavablandırarkən bildirib.

Nazirin sözlərinə görə, suallar hazırlanandan sonra tərcümə ediləcək:

"2027-ci ilin sonlarından başlayaraq məktəblərlə bağlı məlumatlarımızı PISA-nın koordinasiya qurumuna göndərəcəyik. Onlar məktəbləri təsadüfi seçim əsasında müəyyənləşdirəcəklər. Yəni hansı məktəblər seçilərsə, tədqiqat həmin məktəblərdə aparılacaq.

PISA-dan bir il əvvəl, 2028-ci ildə suallar göndəriləcək və şagirdlər onları cavablandıracaqlar. Nəticələr əldə edildikdən sonra mübahisəli suallar müəyyənləşdirilərək çıxarılacaq. Yekun test hazırlandıqdan sonra isə seçilmiş regionlar üzrə həmin suallar cavablandırılacaq. 2029-cu il PISA məlumatları aprel-may aylarında toplanacaq. 2029-cu ilin iyun ayından 2030-cu ilin sentyabr ayına qədər məlumatlar araşdırılacaq", nazir bildirib.

Qeyd edək ki, PISA 2025 çərçivəsində Azərbaycan üzrə 241 məktəbdən 7 500-dən çox şagirdin qiymətləndirməyə cəlb olunması nəzərdə tutulub.

Əvvəlki iki dövrdən fərqli olaraq bütün regionların prosesə daxil edilməsi ölkə səviyyəsində daha geniş məlumat əldə etmək baxımından mühüm addımdır.

Fəridə, Bizim.Media