Qlobal istiləşmə məşhur Yaponiya delikatesi olan fuqu balığının hazırlanmasını daha da çətinləşdirib və potensial olaraq təhlükəli edib.
Belə ki, dəniz suyunun temperaturunun yüksəlməsi səbəbindən fərqli dörddişli (iynəqarın) balıq növləri öz yaşayış mühitlərini dəyişir, yeni ərazilərə axın edir və cütləşirlər. Nəticədə daxilindəki ölümcül tetrodotoksin maddəsinin harada paylandığı hələlik məlum olmayan hibrid növlər yaranır.
Bizim.Media xəbər verir ki, bu barədə "This Week in Asia" nəşri məlumat yayıb.
Zəhərlənmə riskinə baxmayaraq, fuqu Yaponiyada çox yüksək qiymətləndirilir. Bu balıqların bir çox növünün tərkibində iflic, tənəffüsün dayanması və ölümə səbəb ola bilən güclü neyrotoksin – tetrodotoksin var. Bu səbəbdən 1958-ci ildən bəri satış üçün fuqu hazırlayan aşpazlar xüsusi lisenziyaya malik olmalıdırlar. İndi isə iqlim dəyişikliyi bu ənənəvi təhlükəsizlik sistemini çətinləşdirib.
Alimlər xəbərdarlıq edirlər ki, təhlükə hibridlərin mütləq ilkin növlərdən daha zəhərli olmasında deyil. Problem ondadır ki, müxtəlif dörddişli balıqlarda tetrodotoksin fərqli orqanlarda toplanır, yeni hibridlərin isə hansı hissələrinin təhlükəsiz, hansı hissələrinin zəhərli olduğunu dəqiq müəyyən etmək üçün hələlik kifayət qədər məlumat yoxdur.
Yaponiya hakimiyyəti bu növ hibridlərin satışını və istehlakını qadağan edib, lakin onları adi fuqudan vizual olaraq fərqləndirmək bəzən çox çətin olur.
Tədqiqatçılar qeyd edirlər ki, fuqu dəniz ekosistemlərində baş verən daha böyük dəyişikliklərin yalnız bir nümunəsidir. İstiləşmə balıq növlərini yeni ərazilərə köçməyə məcbur edir, burada onlar digər orqanizmlərlə qarşılaşır və normal ekoloji münasibətlərini pozurlar.
Bizim.Media
