Xəbər verdiyimiz kimi, Azərbaycanəsilli ukraynalı dövlət xadimi Teymur Firudin oğlu Tkaçenko (Məmmədov) iyulun 22-də Kiyev Vilayət Dövlət Administrasiyasının rəhbəri (qubernatoru) təyin olunub.
Bizim.Media onun dosyesini təqdim edir:
Şəmkirdə Kiyevə uzanan yol
1989-cu il avqustun 18-də Kiyevdə anadan olan Tkaçenkonun ailə kökləri Azərbaycana – Şəmkir rayonuna gedib çıxır. Atası Firudin Məmmədov Ukraynadakı Azərbaycan diasporunun tanınmış və fəal nümayəndələrindən olub.
1956-cı ildən Ukraynada yaşayan Firudin Məmmədov dünyasını dəyişdiyi 2023-cü ilə qədər diaspor fəaliyyətində aktiv iştirak edib. O həmçinin Azərbaycan Ağsaqqallar Şurasının Ukraynadakı nümayəndəsi idi.
Teymur Tkaçenkonun təhsili və ilk əmək fəaliyyəti
Ali təhsilini Taras Şevçenko adına Kiyev Milli Universitetində alan Teymur Tkaçenko əvvəlcə beynəlxalq iqtisadiyyat ixtisası üzrə magistr dərəcəsi qazanıb. Sonradan isə həmin ali məktəbdə hüquqşünaslıq üzrə ikinci ali təhsil alıb. Beləliklə, o, dövlət idarəçiliyində həm iqtisadi, həm də hüquqi biliklərə malik kadr kimi formalaşıb.
Onun dövlət qulluğundakı fəaliyyəti 2012-ci ildə "Solomyanka-Servis" kommunal müəssisəsində birinci dərəcəli mütəxəssis kimi başlayıb. Elə həmin il Ukrayna Ali Radasında "UDAR" Partiyasını təmsil edən deputatın köməkçisi vəzifəsinə keçərək iki il parlamentdə çalışıb. Bu mərhələ Tkaçenkonun siyasi və inzibati idarəçilik təcrübəsinin formalaşmasında mühüm rol oynayıb.
Dövlət qulluğunda yüksəliş
2014-cü ildə "Zovnıştorqvıdav Ukrainı" dövlət müəssisəsində məsul katib vəzifəsini icra etdikdən sonra fəaliyyətini Kiyev şəhərinin kommunal təsərrüfatı və infrastrukturunun idarə olunması sahəsində davam etdirib.
2015–2016-cı illərdə "Kyivblahoustriy" kommunal müəssisəsində şöbə müdiri, 2016–2017-ci illərdə isə paytaxtın sahil zonalarının inkişafına cavabdeh olan "Pleso" kommunal müəssisəsinin rəhbəri olub.
2018-ci ildə Qolosivski Rayon Dövlət Administrasiyasının aparat rəhbəri təyin edilən Tkaçenko bir il sonra Darnitski Rayon Dövlət Administrasiyası sədrinin müavini vəzifəsinə yüksəlib. 2020-ci ildən isə Kiyev Şəhər Dövlət Administrasiyasının Şəhər Abadlaşdırma Departamenti direktorunun birinci müavini kimi paytaxtın şəhərsalma və abadlıq siyasətinin həyata keçirilməsində iştirak edib.
2023-cü il onun karyerasında yeni mərhələnin başlanğıcı oldu.
Avqustun 15-də Ukrayna Prezidentinin fərmanı ilə Strateji Sənaye Məsələləri nazirinin müavini təyin edilən Tkaçenko müdafiə sənayesi və strateji istehsal sahələrinin koordinasiyasında iştirak edib. 2024-cü il sentyabrın 27-də isə Ukraynanın İcmaların və Ərazilərin İnkişafı nazirinin müavini vəzifəsinə gətirilib.
Həmin ilin noyabrında daha bir mühüm vəzifə ona həvalə olunub. 25 noyabr 2024-cü ildən etibarən Ukraynanın milli poçt operatoru olan "Ukrpoçt"un Müşahidə Şurasına sədrlik edir.
Tkaçenkonun siyasi karyerasında ən mühüm dönüş nöqtələrindən biri 31 dekabr 2024-cü ildə baş verib. Ukrayna Prezidentinin fərmanı ilə o, Kiyev Şəhər Hərbi Administrasiyasının rəhbəri təyin olunub. Rusiya-Ukrayna müharibəsinin davam etdiyi mürəkkəb şəraitdə paytaxtın təhlükəsizliyi, mülki müdafiəsi və şəhərin fasiləsiz fəaliyyətinin təmin edilməsi kimi strateji vəzifələr onun məsuliyyətinə daxil idi. O, 2026-cı il iyulun 16-da bu vəzifədən azad edildi.
Cəmi bir neçə gün sonra – 22 iyul 2026-cı ildə Teymur Tkaçenko Kiyev Vilayət Dövlət Administrasiyasının rəhbəri vəzifəsinə təyin olundu. O hazırda Ukraynanın paytaxt regionunun mülki idarəçiliyinə cavabdehdir.
Soydaşımız dövlət qulluğu ilə yanaşı, ictimai fəaliyyətlə də məşğuldur. O, 2017-ci ildə yaradılan "Friendly People" xeyriyyə təşkilatının həmtəsisçilərindən biridir və müxtəlif sosial-humanitar layihələrin həyata keçirilməsində iştirak edib.
Bizim.Media
