“Böyük Britaniyanın Xüsusi Hava Xidməti (SAS) ölkənin Xarici İşlər Nazirliyinin sifarişi əsasında Azərbaycan xüsusi təyinatlılarına bu postsovet respublikasına təsir imkanlarını artırmaq üçün təlim keçiblər”. Bu barədə musavat.com nüfuzlu “The Sunday Times” nəşrinə istinadən xəbər verir.
“The Sunday Times”ın əldə elədiyi sənədə görə, britaniyalı xüsusi təyinatlılar 6 həftəlik təlim zamanı azərbaycanlı həmkarlarına binaların hücumla ələ keçirilməsi ilə bağlı treninqlər keçib, həmçinin onları snayper vərdişlərinə öyrədiblər.
“Kod adı “Lanark əməliyyatı” olan və 2006-ci ildən start götürən proqramın məqsədlərindən biri İngiltərə XİN-inin Azərbaycanda mövcudluğunu gücləndirməkdir. Qərb siyasətçiləri Azərbaycanın zəngin neft-qaz resurslarına görə bu ölkənin prezidenti İlham Əliyevlə yaxşı münasibətlərdə olmağa çalışırlar. Hüquq müdafiəçiləri isə Əliyevi hökumətini minlərlə fəalı qondarma ittihamlarla həbsə almaq hesabına müxalifəti sıxışdırmaqda günahlandırır”, - deyə nəşr bildirir.
