Hacıqabul rayonunda güclü yanğın hadisəsi baş
verib. Moderator.az Cənub TV-yə istinadən xəbər verir ki,
yanğın nəticəsində rayon sakini, 1938-ci il təvəllüdlü Gilas Qasımovaya məxsus
1-mərtəbəli 5-otaqlı yaşayış evi yanaraq külə dönüb.
Mətbəxdə
iş görən evin gəlini Ulduz Qasımova qonşularının səsinə çölə çıxıb və bir anda
yaşadıqları evin tavanının alovlandığını görüb. Yanğın barədə dərhal FHN-in
Hacıqabul RYMİ-nə məlumat verilib. Nədənsə hadisə yerinə gələn FHN-in
əməkdaşları yanğınsöndürən maşının su nasoslarını işə sala bilməyiblər. Bundan
sonra yanğın yayılaraq, evin bütün hissəsini əhatəsinə alıb. Yalnız sonradan
gələn yanğınsöndürmə briqadaları yanğına müdaxilə etməyi bacarıblar.
Yanğınsöndürənlər
yanğının digər mənzillərə keçməsinin qarşısını alsalar da, Qasımovlar ailəsi
isti yay günündə mənzilsiz qalıblar. Onlara məxsus mənzilin sənədləri və ev
sahibinin dediyinə görə, mənzildə olan küllü miqdarda pul yanaraq külə dönüb. Hələlik
isə, FHN-in əməkdaşları tərəfindən yanğının baş vermə səbəbləri araşdırılır.
