Artıq universitetlərə qəbul olan tələbələrin qeydiyyatı başlayıb. Mövcud qaydalara görə qeydiyyat yalnız Elm və Təhsil Nazirliyinin portal.edu.az platformasında elektron formada aparılmalıdır.
Aparıcı universitetlərin böyük əksəriyyəti kağızdan və paralel qeydiyyatdan imtina ediblər. Hətta regionlarda olan universitetlərin də böyük əksəriyyəti qeydiyyatı yalnız Nazirliyin platformasında elektron formada aparılamsı haqqında elanlar verib. Bu universitetlərin rektorlarının səlahiyyət verdiyi əməkdaşlar yeni tələbələrlə bağlı bütün datanı Nazirliyin elektron sisteminə daxil olaraq bir anda əldə edə bilirlər. Amma təəssüf ki, hələ də paralel qeydiyyat aparan və kağız sənədlər tələb edən universitetlər var.
Universitetlərin kağız sənəd tələbi nə dərəcədə doğru yanaşmadır?
Mövzu ilə bağlı fikirlərini Bizim.Media ilə bölüşən Millət vəkili Ceyhun Məmmədov deyir ki, elm və texnologiyanın bu qədər inkişaf etdiyi bir dövrdə, cənab Prezidentin E-hökumətlə bağlı bütün tapşırıqlarına baxmayaraq bəzi universitetlər elektron sistemə keçməyiblər:
“Sənədləri elektron qaydada deyil, kağız formatında tələb edirlər. İKT-nın sürətlə inkişaf etdiyi və hökumətin bu sahədə apardığı davamlı siyasət müqabilində bəzi universitetlərin hələ də kağız sənəd tələb etməsi təəssüf doğurur. Bu ictimai anlaşılmazlıqla yanaşı, tələbələr üçün də ciddi problem yaradır. Bu reallıqdan təkcə tələbələr yox, valideynlər də ciddi əziyyət çəkir.
Hesab edirəm ki, bu və digər səbəblərə görə biz kağız sənədləşmələrindən birdəfəlik imtina etməliyik.
Bütün sahələrdə, o cümlədən universitetlərdə sənədlərin qəbulu elektron qaydada aparılmalıdır. Bu vaxta qənaət baxımından da önəmlidir. Üstəlik, bu tələbələr arasında yeni vərdişlər mühiti yarada bilər.
Elektron sənəd dövriyyəsi həm də yenilikləri mənimsəmək baxımından çox önəmlidir. Ona görə də hesab edirəm ki, bu məsələ xüsusi diqqətə alınmalı və problem ən qısa zamanda öz həllini tapmalıdır. Axı müasir dünya bu sistemlə çalışır. Biz də özümüzü müasir dümyanın bir parçası hesab ediriksə, o zaman innovativ çağırışlarla ayaqlaşmalıyıq”.
Surxay Atakişiyev, Bizim.Media